ياحصان فك اللجام

ياحصان فرقع حوافرك في الظلط
أنا وانت والكارو انسجمنا مع الهوان
من غفلة في الزمن الغلط……………..
شاقين دروب أم در أمان
كانت زماااان أم در أمان
حسى الحريق نهش الشوارع والبيوت
والميادين والدكاكين واليفط
مافيش بشر
بس الكلاب وأرتال قطط
…………………
شيتا” مخيف
زلزال وبس
زي التقول زارنا القدر
شيتا” غريب
شيتا” عجيب
لابيتفهم لا بترسم
حتي الحروف أبت النقط
………………..
……………….
ياكارو بس بشويش علي
أنا زول مرضرض بالصدام
أنا زول مجرح
أنا زول مقطع
بسكاكين الكلام
أنا زول مستف بالكدر
أنا مرتين ضهري إنكسر
………………
………………
ياكارو بس
أحميني من حمي السفر
ما داير أفوت
أخلي الشوارع والبيوت
ل (حميدتي) وللغجر
………..
وكيف يكون حتي السفر
والمطار أصبح دمار
والسكة ما عادت حديد
سرقو الفلنكات والقضيب
مافيش تذاكر أو قطر
………………
آآآآآآه يا وطن
أديني بس حبة مروة عشان أقيف
أسندني في عمر الخريف
أديني بس حق الرغيف
أديني بس ريدا” سلام
أديني بس حضنا” نضيف
أسندني
تكلني
أنهرني
ما تخليني لو لحظات أنوم
أنا داير أعيش
أنا داير أقوم
أقطع رقاب (الجنجويد )
أكتب سطور سودان جديد
……………..
آآآآآآه ياطن
…….
واااااا حرقة سما الخرطوم
يفوت كسري يجوها الروم
واااا ضيعة ثري أم درمان
يفوت (بشبش)
يجي( البرهان )
واااا خجلة أرض سودان
وكت اتقاسموها الدخلا والكيزان
مع الفيران
……………….
……………….
ياحصان
فك اللجام
فك اللجام
فك اللجام
طير بي عديل
رجع زمان الاعتصام
حسا بس
الموت حلال
والله أبدا حرام
(خلي) حسي الموت حلال
والله أبدا ما حرام.

أبوظبي …
٨ أكتوبر 2023