(يوسف كوة قالا)..

(يوسف كوة قالا)..

ويوسف كوة قالا ..
لا للظلم .. لا.. لا ..
مرحب بالعدالة ..
والعزم الحديد ..
يوسف كوة مكي ..
طلقة ودانة سونكي ..
جوة الغابة سار ..
إتوغل جنوب ..
وإتوغل يسار ..
سار للتنمية ..
المستشفى لازم ..
قبال المحاكم ..
ومدرسة للصغار ..
يا الفعل المصادم ..
لي جرح البلاد ..
زي شاش الغيار ..
في الماظ طلعنا ..
وعلى عبد اللطيف ..
بالفعل المصادم ..
والحلم الشريف ..
وكان الدم موزع ..
في هذا الرصيف ..
مستشفي العيون ..
زي ما تكون علامة ..
للكان والبكون ..
أبدا ما حلمنا ..
بالمال والبنون ..
إلا عتاد وعدة ..
وكوكبة مستعدة ..
لا هزاها باطل ..
لا تغشاها ردة ..
تهزم كل مهيمن ..
وغطرسة مستبدة ..
وللكان والبكون ..
في البلاد رجعنا ..
يوم دامرقة جعنا ..
كنفتنا المراحل ..
وبي المورال شبعنا ..
كنا بليلة نأكل ..
ومرات مافي حبة ..
وبيناتنا التفاهم ..
وبيناتنا المحبة ..
والفكر السديد ..
دكتور جون معلم ..
سودانا الجديد ..
بالدم المقداد ..
في كوش خت طوبة ..
زي دبلة خطوبة ..
لي كل البلاد ..
من نمولي لحلفا ..
بورتسودان جنينة ..
سودانية تغزل ..
نجمة تضوي لينا ..
في العلم الجميل ..
وأخضر زرع وغابة ..
خضرتنا المهابة ..
وأبيض ياسلام ..
وأسود .. عالي .. عالي ..
يهتف في الأعالي ..
السودان مجيد ..
وأحمر ورده قامت ..
فوق قبر الشهيد ..
دكتور جون معلم ..
سودانا الجديد ..