كتب د.صلاح جعفر

اسوأ حاجة ممكن نقع فيها هى إنه نكرر الخطأ القديم ونقبل تسويق (الوحدة الزائفة) و(الابطال الزائفين) فى  الفترة دى.

الوحدة الزائفة البتجى تحت مسمى الجبهة العريضه،الواسعة  الموحدة، الكبيرة …..الخ من  المسميات البتفيد الكترة ولا شي غيرها.

قبة بلا فكى.

الوحدة البتقدم على أنها هى الغاية فى حد ذاتها  وليست وسيلة لتحقيق اهداف التغيير.

افضل يكون عندنا كتل متعددة واضحة المعالم (فيما يخص فهمها للتغيير)، متفقه على إسقاط الانقلاب ومختلفة باسس واضحة فى ما يليهو ولا يكون عندنا كتلة واحدة هى عباره عن (مجرد لمة ناس)متفقة على إسقاط الإنقلاب ومختلفة على ما عداهو من غير فواصل واضحة.

نحن ما محتاجين نسمح  تانى بتمرير الغلط دا، مع الاعتراف انو قحت اللام هى أسوأ حاجه مرت على تاريخ التحالف السياسي فى  السودان بطريقة تكوينها وعملها.

وقحت المتبقية (المؤتمر السودانى،التجمع الاتحادى، البعث،حزب الامة جناح مريم الصادق و صلاح مناع وشلة مهنيي قحت )هى أسوأ ما يمكن يحصل لينا مستقبلاً..

فعشان كدا ننتبه لمحاولة اختزال الصراع فى مسمي عساكر/مدنيين، غير انو تبسيط وتجهيل هو باب بتاع شرور كتيرة اولها مدخل للوحدة الزائفة القائمة على استثارة الغريزة ضد العدو المشترك وليس آخرها  تعميه للاختلاف واستهبال سياسي وإخفاء عدم التناسق, الإختلاف و طمع الوصول للسلطة بدون استحقاق.

الباب دا باب تضليل لانو ما بجاوب على التغيير الدايرنو شنو أو الما دايرنو شنو بوقف النقاش عند العسكر/الكيزان وبقفز علي ما عداه وطوالى بطرح نفسو كبديل ليهم وبتجاهل عمداً انه نحن مش رافضين العسكر عشان ما بلبسوا جلابية أو بدلة ولا رافضين الكيزان عشان اسمهم نحن رافضنهم عشان ممارستهم وعندنا تصور لممارسه مختلفة بنحلم بيهو فما ممكن نقبل بالممارسة  القديمة  تحت اى شكل أو تحت اى لافته جديدة.

وتجربة السنتين الفاتو بتورينا ابتداء من النكوص على شعارات الثورة (من العسكر شريك أصيل، تقفيل الجسور البدأ فى حكومة الثورة ضد الثوار ، السلام ، كذلك عسكورى واردول ومعظم الشغالين مع الانقلاب حاليا هى تعيينات قحت ما جابوهم العساكر،حرمان الناس من الدواء، تشكيل لجنة التهريج ….الخ إلى النكوص من التعهدات القدموها هم ذاتهم  (ما حنشارك فى  السلطة …الخ) وتبقي عظة ودرس والا بعد سنتين حنكون تانى فى نفس الحته او اكعب منها.

التيار العاوز الوحدة الزائفة هو تيار البضاعة الفاسدة تيار السودان القديم القائم على انو السياسة فهلوة و طنق حنك و القصة سلطة وبس من غير تقديم اى إلتزام واضح غير شوية كلام  قابل للبلع  والبذكرهم  بيهو حيكون كوز أو شيوعي.

عشان كدا ماف خيار لينا سوى المواقف الحاسمة وقطع الطريق على مجموعات الاستهبال دى، البتتغذى على الدم  والسلطة زيها وزى العسكر  مهما تدثرت بشعار الثورة أو استخدمت آلتها الاعلامية فى تجريم كل من يرفض طرحها  (حنسمع تانى الحُمر و وكيزان قريب، الحاصل دا لمه ضنب عشان السلطة الضائعة مع احسان الظن طبعا ).

ما عندنا غير نتمسك بموقفنا ونتلمه عليهو  ونبعد منو كل من غير مقتنع بيهو.

موقفنا المقصود هو#لاشراكةلاتفاوضلأشرعية.

لا مجال لقبول أي شراكة مع العسكر في الحكم تحت أي ذريعة كانت أو أي مسمي، وان تقوم القوات النظامية بادوارها وفق الدستور والقانون ( لعسكر وليس المكون العسكرى).

لا شرعية لاي من مكونات الفترة الانتقالية السابقة بعساكرها و مدنييها يعنى ماف وثيقة دستورية يعنى ماف قحت و مكون عسكرى كشركاء سلطة دا مربع نحن اتجاوزناهو زمان.

لا تفاوض، فقط  إجراءات التسليم والتسلم ولا اى شروط ولا تفاهمات.

قيام سُلطة مدنية انتقالية خالصة بوضع دستوري جديد من كفاءات تنتهى بإجراء انتخابات حرة ونزيهة تكون مَهامها:

تسيير دولاب العمل بالدولة في الفترة القادمة و تحضير لقيام مؤتمر قومي شامل خلال عام  يُناقش الدستور(المبادئ الدستورية، نظام الحكم وهيكلة الدولة)، اصلاح السلطة القضائية، الخدمة المدنية، القوات النظامية، قانون الانتخابات، الاتفاق على خُطة تنموية للبلاد مُلزمة للجميع لفترة زمنية لا تقل عن عشرسنوات.

اما بالنسبة لى أبطال الورق بنجيهم برواقة مرة  تانية.

#الثورة_مستمرة

#مجزرة١٧يناير

#السودان