زادت .. تركة الهمباتة..
بين .. لكنّ ..
كلامهم كلو ..
فيهو .. ال .. إنّ
فيهو .. اخواتها ..
..
ناس .. عَن .. عَنّ
فرشوا سباتة
للجودية ..
بين .. الطلقة .. والشفاتة
بين .. النخبة .. والحرية
….
ناس .. ناساتها ..
دوّروا .. سنَّة
فى البادوبة ..
كانوا .. كتيبة
والمحبوبة ..
فد .. ويحيدة .. كرسى السلطة ..
…..
نحن .. رطننا ..
وى .. وى .. وى … كأنّ .. كأنّ
ما بفهمنا
الا .. اهلنا ..
.. الا الشهداء
.. طير الجنّة
***
اصحا يا ترس الخلاص
لسه .. ما زال القضية
ولسه .. ما جبنا القصاص
**
مافى زول يجدع درقتو
نحن جوه .. المعركة
كل فعل .. وليهو .. وقتو
***
اول حاجة : دم الشهدا
تانى : عروضنا .. حق بنوتنا
تالت حاجة : دم الشهدا
…
ما بنرجع نصد لبيوتنا
من درب النضال .. فى النص
ولا بنقبل .. حلول .. نص نص
***
هسه فوق كبرى الحديد
الهتافات ..
الهتافات
ناس كولومبيا .. هوى .. سلامات
هسه دا النيل .. وللا تابوت ؟
فيهو غايب كم شهيد ؟
****
ما نسينا المجزرة
لا الدمازين اتمحت
لا قطارات اتبرا
نحن ندخل برى بالنص
من زقاق المقبرة
****
نحن كلنا في المحك
المُرجفة
الثوار صحي
المطاليق
المساطيل
الائمة
والمتثاقفة
الساسة
النقابات
المساكين
الطيابة بلا حزب
ناس الصلاة على النبي
وناس الكضب
ناس الشكك
والنازحين زيت الحرب
والنخبة خاتالنا الشرك
تحت الخُطب
في مسرحها الجنب النفق
…
مين اللي فض الاعتصام
مين اللي فض الاعتصام
…
نحن سكان الخيام ..
ما .. الخيام
التحرقا ..
…
نحن ذاتنا الاعتصام
ما .. الكراسى
التسرقا
….
نحن والشهدا .. الكرام
حزمة ..
حاول .. فرقا
…..
نحن .. نحن .. على الدوام
ثورة ..
عالية .. بيارقا
****
اى زول .. كاتل شهيد
هسه .. حايم فى سلام
….
يبقى كيف سقط النظام ؟
****
قول ..
الجنة .. فيها .. موسيقى ؟
قول .. لو متنا .. فى الجايات
هل ح نلقى فيها .. طريقة .. ؟
….
قول ..
فى الجنة .. فى الساحات
لاقيتلك .. حمامة .. رفيقة ؟
…..
وهل بتمر … عليك .. لحظات
تشتاق .. للقيادة .. وضيقا ؟
****
الحاصل لى حد الآن
يا شهدا الخرطوم محتلة
محتلة .. تماماّ بالقتلة
والناس اتفرزت كيمان
والباقى المرقة على السهلة
****
هسه داير لى قلادة
وسبحة من .. فاضى الطِّلَق
ذكرى من ..شهدا القيادة
****
نحن ماسكين فى بلدنا
جوه فى الفعل المضارع
لسه ما زلنا بنصارع
****
نحن طيبين ..
وانت كيف ؟
نحن ماسكين فى بلدنا
جوه فى الفعل المضارع
لسه ما زلنا بنصارع
فى الخفافيش
والمرابين ..
رغم اصوات الضفادع
…
وانت كيف ؟
نسمة فى الصيف ؟
والله شارع
فى الفراديس ؟
نخلة القيف ؟
جوه جنة
…
واللا .. كيف ؟
….
نحن طيبين
يانا ذاتنا
ثورة فاتت
ثورة هسه
وثورة بعدين
….
وانت كيف
****
قول .. زنازين
شهدا ؟ آمييين
نحن ثورة وولعت .. بَقْ
الا كان تدفننا حيين
***
شهيد يهتف …
شهيد يخطف … شهيد ينزف
من الطوفان …
شهيد … يسند شهيد واقف
على الامكان
شهيد يزرع شجر وارف
على جرف الهوى السودان …
شهيد قد مات …
شهيد … فى الحى ..جناهو الحى
شهيد …..
خلى الجدارية ..
ومسك جرح البلاد النى ..
***
من النجمة صاحى ..
نمت .. على قصيدة
من بنوت جراحى
وصوت الساكسفون
فى صمت النواحى
….
لفيت المدينة
لافينى الارق
عبتنى السكينة
فى فاضى الطِّلَق
نفضت لى ايدينا
من .. دم الشفق
غنت .. ما علينا
من اعلى .. النفق
…..
من طرب الاصابع
فى صورة الشهيد
يبدو كانو .. طالع
من ضلفة نشيد
قام مدالو شافع
من الجنة .. عود
ورتبلو المطالع
فى بيت القصيد
….
فى ليل القمر
لفيت من شجن
فى اول ممر
قال لى الوطن :
كلو من السهر
قدام القيادة ..
ما تلوم القمر
واللا الساكسفون
يوم جية القطر
